60 نصيحة للمهندسين قبل العمل في المقاولات لحسابك الخاص - مهندس مصطفي عفيفي
1- ما تأخذ شغل خاص وانت حديث التخرج، لابد من العمل كموظف في شركة أولا قبل ما تأخذ هذه الخطوة.
2- لا تشارك أحدا حد، ابدأ بمفردك اذا كنت جاهز أو انتظر حتي تكون جاهر.
3-سوف تقابل مقاولين وناس معارفك تريد ان تشاركك.. تذكر إني قولت لك بلاش.
4- لا تشتري خشب نجارة خشب على الأقل في الأول، هات مقاول بعدته أفضل.
5- لا تستعجل ابدا.
6-لكي تأخذ شغل مقاولات لحسابك لابد تكون اشتغلت كمهندس تنفيذ في شركة أولا.
7- يفضل تكون اشتغلت مكتب فني كمان أو تعرف تقوم بشغل المكتب الفني.
8- مهم يكون عندك طقم صنايعيه وعمال محترم وتكون اشتغلت معهم قبل ذلك وجربتهم في شغل.
9- الصنايعيه والعمال اللي معاك لازم تكون عارفهم جيدا وتقدر توصل لهم في أي وقت.
10- لازم يكون عندك في كل بند أكتر من مقاول.
11- الصنايعيه والمقاولين والعمال هما رجالتك، حافظ عليهم وخلي علاقتك بيهم جيده.
12- لازم تكون عندك قائمة موردين لجميع الخامات ويفضل ان تكون قد تعاملت معهم سابقا.
13- يجب ان تكون قوي فنياً وان تكون لديك الخبرة الكافية لاستلام البنود في الموقع.
14- يجب ان تكون قوي إدارياً وبتعرف تتعامل مع الصنايعية والعمال وتحل مشاكلهم.
15- يجب ان تكون لديك الخبرة الكافية لكتابة المقأيسات.
16- يجب ان تكون لديك الخبرة الكافية لحصر الكميات.
17- يجب ان تكون لديك الخبرة الكافية لتسعر بنود الاعمال.
18- يجب ان تكون لديك الخبرة الكافية لعمل المستخلصات.
19- الحاجات اللي فاتت دي لو لسه ماتعرفهاش يبقى انت مش جاهز دلوقتي.
20- مش لازم يكون معاك رأس مال عشان تبدأ.
21- عشان تبدأ بدون رأس مال يبقى تشتغل مع عملاء أفراد مش شركات.
22- لو معاك رأس مال لا تجازف بأكثر من 25% منه.
23- اذا قررت تشيل شغل من شركات في البداية (لا انصحك) لازم تكون عامل حسابك إن مستحقاتك سوف تتأخر وفي استقطاعات يتم خصمها لازم تكون حاسبها كويس.
24- لو هتشتغل مع عملاء أفراد أفضل طرق اتفاق هي الـ Cost Plus والـ Fixed Fees
25- يجب ان تكون لديك خبرة تسويق لشغلك.
26- أصعب عقبة سوف تقابلك في الشغل هي إنك تجلب شغل في البداية.
27- لا تآمن للصنايعية والعمالة.
28- لا تأمن للعملاء.
29- لا تأمن لاحد.
30- لا تاخد شغل شغل اكبر من استطاعتك.
31- لا تعمل في شئ ليس لديك خبرة ومعرفة ودراية به.
32- لا تعمل لحسابك إلا لو عندك شوية خبرة وعلاقات تتسند عليهم.
33- شغل المقاولات بيكسب فلوس كتير (أكثر مما تتخيل) لو عرفت تديره صح.
34- شغل المقاولات بيخسر فلوس كتير (أكتر مما تتخيل) لو ماعرفتش تديره صح.
35- لو انت لسه متخرج ومش عاوز تشتغل موظف عند حد وتبدأ بشغل لحسابك بلاش عشان هتندم.
36- ليس من الضرورة ان تنتظر كثيرا بعد التخرج لكي تبدأ.. وليس لها فترة ثابته.. بس انت لو اجتهدت ممكن خلال سنتين بعد تخرج تقدر تبدأ شغل خاص لحسابك.
37- وانت شغال في الشركة كموظف أكتر حاجة تركز عليها هي العلاقات والإداريات.
38- افتكر دايماً إن رضا العميل مرتبط بـ 3 حاجات (الجودة والتكلفة والوقت) لو قدرت تشتغل على الـ 3 عوامل دي سوف تنجح سريعأ.
39- هتقابل ناس تخوفك من خطوة إنك تشتغل لحسابك، ماتسمعلهومش.
40- أهم حاجة في الشغل سمعتك.. راعي ضميرك في الشغل واجتهد عشان الـ word Of Mouth عنك هي اللي هتجيبلك شغل.
41- لا تستصغر أي شغلانة.
42- الشغل يجلب شغل.
43- هتتعب شوية على ماتعرف تجيب أو شغلانة، لا تيأس.
44- استلم كل حاجة بنفسك.
45- لا تترك الوظيفة إلا لو وقفت شغلك الخاص على رجله.
46- حاول الا تصرف على الشغل من جيبك.. الشغل يصرف على نفسه.
47- حاول شغلك يكون قريب من بعضه عشان تقدر تتابعه.
48- شغل المقاولات هو أكتر حاجة بتجيب فلوس بعد الآثار والمخدرات😅.
49- الناس اللي هتحبطك في الأول بيعملوا كدة إما عشان هما بيكرهوك ومش عاوزينك تنجح، أو بيحبوك وخايفين عليك تفشل، مالكش دعوة بالأثنين.. كمل في طريقك انت صح.
50- شغل التشطيبات أسهل في التسويق وشغل الخرسانات أسهل وأسرع في الشغل.
51- لا تستعجل خطوة إنك تأسس مكتب مقاولات إلا لو هتشيل شغل من شركات ومحتاج أوراق قانونية.
52- لو محتاج مكان تأسس عليه أوراق رسمية أو تقابل فيه العملاء ممكن تستعين بـ Co-working space
53- الشغل مع الجهات الحكومية فلوسه مضمونه ولكن تتأخر.
54- الشغل مع الشركات الخاصة فلوسه لا تتأخر ولكن ليست مضمونه.
55- الشغل مع العملاء فلوسه مضمونه ولا تتأخر لأن العميل هو الذي يصرف على الشغل.
56- أكتر حاجة تكسبك أو تخسرك هي إنك تكون بتعرف تسعر البنود صح.
57- القدرة على إقناع العميل مهارة لو لم تكن لديك يجب ان تتعلمها.
58- المقاولات هي Mix بين الهندسة والتجارة والإدارة، لازم تكون فاهم ده كويس.
59- راعي ضميرك في شغلك.
60- لا تاكل حق صنايعي أو عامل أمن لك على حقة وعرقه، ولا تخون أو تسرق عميل أمن لك على فلوسه.
هذه هي ال 60 نصيحة لمهندسي مدني وعمارة وجميع اقسام الهندسة لكي تبدا في شغلك الخاص سواء مقاولات عامه او غيرها
مهندس :- مصطفي عفيفي